Aixerrota mendibizikletazaleen elkartea

Dolmenen bidean zehar

2007-08-27T23:27:00.000+02:00

Aspaldi honetan dolmenen bidean zehar ibili gara ibilbide hori arakatuz. Dolmenen bidea Berangoko hilerrian hasten da eta Unbe tontorrean amaitzen. Bi alternatiba daude aukeran: dolmenen bidea Berangoko aldapetan hasi edo Unbeko mendigainean. Gogorragoa da Berangoko hilerritik hasita oso aldapa malkartsua eta harritsua igon behar delako. Hona hemen dolmenen bidean hartutako argazki batzuk:

Sopelanan zehar

2007-03-07T08:13:00.000+01:00

Martxoaren lehen igandean, 4. egunean hain zuzen ere, egindako txangoko argazkiak dituzue hemen. Aitor etxebarritarrarekin topo egin genuen. Gazte gizgaixoa bakarrean zegoen lagunek galdua baitzuten. Sopelanako hondartzako argazkiak historikoak izango dira laster, hondartza ondoko etxea botako dutelako (hesiaren atzean ageri da). Iñaki lagunak zorte txarra eduki zuen gurpila bihurritu zitzaiolako; hala ere, onik eta ederto heldu ahal izan zen etxera.

Azken irteerak Zierbena eta Erandiora

2007-02-12T11:55:00.000+01:00

Negua ez da oso aproposa izaten bizikletaz ibiltzeko. Hala ere, Aixerrotan, noizean behin, neguan ere irteten gara osteratxo batzuk egitera igande goizean. Azkenekoak Zierbenera eta Erandiora egin ditugu. Egun hotzak gorabehera, mendi-bizikletaz ibili behar, kirola egitea gure helburua delako.

Nor ausartzen da?

2007-01-14T09:04:00.000+01:00

Beñat Gaztelumendi

Doluminak Ricardori

2006-12-18T10:53:00.000+01:00

Ricardoren aitaren heriotzak dolua ekarri digu Aixerrotara. Goian bego eta bihoakio lerro hauetatik, Aixerrota osatzen dugun guztion partez, gure gomuta, Ricardok momentu triste hauek ahalik eta hobetoen igaro ditzan.

Mountain Biking bideoa

2006-12-12T15:32:00.000+01:00

Ea gustatzen zaizuen bideo hau. Seguraski, gazteen gustukoa da.

Eurobike: bizikletazaleen topagunea

2006-12-11T15:06:00.000+01:00

Hemen daukazue Alemaniako Eurobike 2006ko irudiak bide batean. Bost minutu pasatxo Eurobike azoka iruditan ikusteko. Ingelesez dago.

Mendi-bizikleta estropuzoak

2006-11-24T20:27:00.000+01:00

Mendi bizikletaren esparruan ere ikusten dira noizean behin erortzeak eta estropuzoak. Ikusi bideo hau mendibizikletalari zoritxarrekoak ikusteko.

Unibertsitateko MB lasterketa, lainopean

2006-11-13T08:09:00.000+01:00

Ikasturtean zehar bi rally antolatzen ditu Euskal Herriko Unibertsitateko Kirol Zerbitzuak udazkenean eta udaberrian. Aurreko larunbatean, ikasturte honetako lehen lasterketa burutu zen Leioa-Erandioko campuseko kiroldegi berriaren ondoan. Helmuga eta irteera gunea frontoietan jarri zen eta 37 partehartzaile izan zituen txapelketak. Jakina denez, ikasleek kreditu bana lortzen dute baldin eta ikasturteko bi probetan parte hartzen badute. Tamala hartu genuen bi ikaslek ezin izan zutelako korritu kaskorik gabe presentatu zirelako. Zirkuitoa ondo seinalizaturik zegoen eta xiri-miri egin zuen goiz osoan zehar. Lainoa zegoen eta tamalez zenbait tokitan lokatza topa zitekeen. Probak bi kategoria zituen: gizonezkoena eta andrazkoena. Mutilek 10 bira eman behar izan zizkioten zirkuitoari, hau da, 16,4 kilometro; eta presentatu zen neska bakarrak 8,6 kilometro egin zituen, zirkuitoari 5 bira emanez. Joseba Fernandez Gamindek irabazi zuen gizonezkoetan eta Eneritz Alkortak andrazkoen kategorian. Hona hemen zenbait argazki, blog honetan lehengo egunean argitaratu nuen bideoa galdu dutenentzat (klik eginez gero, tamaina handian ikusi ahal dira):

Mendatako bigarren MB ibilbidea

2006-11-12T19:59:00.000+01:00

Gaur goizean Mendatara abiatu gara Aixerrota MB elkarteko kide batzuk. Azkenean, Iñaki, Kepa eta hiruok abiatu gara furgonetaz Mendatako Mendi Bizikleta harrera gunea bisitatzeko asmoz. Mendatako eleizaren ondoan harrera gunea ikusi dugu Zugastietako bidea hartuta. Getxo, Erletxeko kurtzea, Zornotza, Zugastieta, Urrutxu eta Albiz dira auto ibilbidean ikusi ditugun herriak mendi bizikleta gunera heldu baino arinago. Gunea, gure ezusterako zabalik zegoen eta bertan Judith neska atseginak informazioa eman digu. Nik kamiseta berdea erosi dut 10 eurotan eta berehala hartu ditugu bizikletak 2 ibilbidea egiteko. Mendata urian hasi eta Mendatan bertan amaitzen da 24 kilometroko ibilbidea (18 agertzen da propagandan). Ibilbide honek badu parte polit bat, bizikleta bidea mendian barna sartzen denean behin lehen 6-8 kilometroak egin ostean. Aldapan behera egin dugu ziztu bizian bide txarrak eta asfaltatuak dastatuz. Zenbait momentutan lokatza zela-eta, beldurra sentitzeko moduan egon gara. Baina dena ondo joan da Gernikako bidea hartu nahian. Gero, berriz ere errepide arriskutsua (Zornotza-Gernika) Ajangiz herrira heldu arte. Bertatik, seinalizazioa oso txarra eta nahiz eta jendeari galdetu, galdu egin gara. Hala ere gure zentzuak eta bapatean topatutako Joseba Zabala lankide ohiak jarri gaitu berriz ere Mendatako bidean, itzuleran. Aldapa itzela igon eta ordu eta 43 minutu pasatu ostean berriro ere etxera Mendatako MB harreragunetik. Hona hemen argazkiak. Mapak ere jarri ditut ibilbidea eta Busturialdea hobeto ezagutzeko.

EHUk antolatutako MB lasterketa

2006-11-11T19:34:00.000+01:00

Azaroaren 11. egunean, larunbatean, Euskal Herriko Unibertsitateak urtero legez mendi bizikleta lasterketa antolatu du. Leioa-Erandioko campusean izan da unibertsitate kiroldegiaren eta frontoien ondoan. Guztitara 37 partehartzaile izan ditu lasterketak eta Joseba Fernandez Gaminde izan da irabazlea gizonezkoetan zirkuitoari hamar bira eman ostean; andrazkoetan, garaileak 5 itzuli baino ez ditu egin behar izan, berau Eneritz Alkorta berriztarra izan delarik. Hemen uzten dizuet larunbatean egin dudan bideoa MPEG1 formatuan (VCD). YouTube.com gunean utzi dut zuen blogetan ere errazki sartu ahal izateko. Musika Lucie Silvas britainiarrarena da eta eskerrak ematen dizkiot kanta hau zoragarria delako (gomendagarria da oso kantari honen azken diskoa erostea). Baina, bestalde, agian baten batek eduki nahi du bideoa deskarga zuzena eginez EHUko zerbitzaritik; horretarako loturan klik egin eta gorde zuen disko gogorrean, bideoa copyleft moduan burutu dudalako; eduki pazientzia deskargatzen 44 MB direlako:

Bideoaren deskarga [44 MB, VCD-MPEG1 formatuan; bideoaren iraupena: 3'3'']

Woodpark edo MTB egurrezko parke baten adibidea

2006-11-07T11:20:00.000+01:00

Mountain biking delakoa egurrezko parke batean zer den ikus dezazuen ekarri dut hona bideo hau musika zoragarriarekin:Berloiz-en "Symphonie Fantistique" eta Linkin Park-en "Pushing Me Away" doinuekin. Gozatu!

Mendatako MTB gunea, helburu

2006-11-07T08:48:00.000+01:00

Datorren igandean, Aixerrota ondoan geratuko gara oraingo honetan Euskal Autonomi Erkidegoan dagoen MTB zentro bakarrera joateko asmoz. Mendatako harreragunetik Urdaibaiko ibilbidea egingo dugu baldin eta eguraldiak laguntzen badu. Euria eginez gero, irteera hori ez dugu egiten. Gorkak furgoneta ipiniko du eta horrek esan nahi du hiru bizikleta eraman ahal dituela. Aingeru animatzen bada, agian aukera daukagu jende gehiago eramateko, Isidoro ezin delako joan, nahiz eta bere furgoneta azkenean sufrimendu handia pasatu ondoren konponduta dagoen jada. Ibilgailua eraman beharko dugunez, posta elektronikoz esaten badidazue joango zaretenentz, eskertu egiten dizuet; modu horretan, ibilgailuen kontua antolatu ahalko dugu. Asteburu honetan, beraz, bi gertakari: EHUko MTB zirkuitoa zapatuan eta Mendatako MTB gunea igandean. Ea eguraldiak laguntzen duen.

Whistler MTB parkearen bideoa

2006-11-06T15:31:00.000+01:00

Seguraski, gaur egun, munduan dagoen mountain bike parkerik ezagunena Whistler da. Mendi bizikleta parke hau Kanadako mendebaldeko kostaldean dago Vancouver hiritik hurbil. Bertako parkea izan da eredua munduan zehar egun dauden parkeak sortzeko. Pelikula honetantxe ikus dezakezue parkea 2:28ko iraupena duen bideo batean. Uxala Euskal Herrian laster horrelako bat edukiko bagenu!

Euskal Herriko Unibertsitateko MTB ibilaldia

2006-11-05T20:02:00.000+01:00

Azaroaren 11. egunean, larunbatean alegia, Euskal Herriko Unibertsitateko Kirol Atalak mendi bizikleta irteera antolatu du. Ikasturtean zehar bi egin ohi dira eta bi ibilaldietan parte hartzen duten ikasleek kreditu bana lortzeko aukera dute. Azaroaren 11ko irteera gunea Leioa-Erandioko campuseko kiroldegia da, goizeko 10.30etan hasita. Lasterketa goizeko 11.00etan hasiko da eta 10.30etan kiroldegian bertan eman daiteke izena zirkuitoa egin ahal izateko. Lasterketak kiroldegian eta frontoietan dauka ibilbidea, zirkuitoa zenbait aldiz egin behar delarik. Igaz, hogei bat partaide izan ziren eta aurten zaletu gehiago espero da.

Serantes tontorrerainoko ibilbidea

2006-11-05T19:57:00.000+01:00

Gaur goizean, Aingeru, Ricardo, Fermin, Kepa, Iñaki eta seiok Santurtzirako bidean abiatu gara goizeko 10.00etan Serantes mendira igotzeko asmotan. Bi ordu eta berrogei minutu eman dugu joan-etorria egiten Aixerrotako aparkalekutik. Guztitara 30 kilometro egin ditugu. Serantes tontorretik bista zoragarriak zeuden oso egun garbia geratu baita. Aingeruren kamerari esker (hobeto esanda, Nokia N Series telefonoari esker) egindako argazkiak dituzue behean (klik eginez gero tamaina handian ikusi ahal dira):

Ljubljana hirian BMX zirkuito berria

2006-11-04T09:42:00.000+01:00

Esloveniako hiriburuan mendi bizikleta parke berria zabaldu dute urrian. Ljubljanan, beraz, mendi bizikleta zenbait modalitate praktikatzeko aukera dago orain, bertakoentzat eta kanpoko bisitarientzat. BMX zirkuitoak argia dauka, baita pantaila eskerga eta musika ere. Zehazki Ljubljana hiriko Linhartova kalean topa daiteke. Oporretan bertara joanez gero, mendi txirrindulariak aukera ezin hobea dauka Esloveniako mountain bike park onena bezala aurkezten den gunea bisitatzeko. Gazteentzat espreski egina, zalantzarik gabe. Beheko argazkian ikus daiteke zirkuitoaren alderdi bat.

Mendi bizikleta parke berria Tenerifen

2006-11-03T09:28:00.000+01:00

Kanariar Irletan mountain bike park berria eraiki dute aurten eta 2007ko hasieran zabalduko dituzte ateak. Internet-en BikeparkTenerife.com helbidea sortu dute bisitariek ikus dezaten non dagoen eta zelakoa den. Parkeak 133.000 metro karratu ditu eta zortzi modalitateko zirkuitoak egin dituzte zaletu guztien gozamenerako: freeride-a, downhill-a, waterjump edo uretarako jauziak... Teguise udalean kokaturik dago eta woodpark edo egurrezko parkea ere dauka. Informazio gehiago 2RuedasMTB.com gunean topa daiteke (argazkia gune honi esker zuenganaturik).

Serantes mendira igon gura

2006-11-02T18:02:00.000+01:00

Datorren igandean Serantes mendira igotzeko asmoz aterako gara Aixerrotako aparkalekutik. Ea oraingo honetan zortea daukagun eta lortzen dugu igotzea eta itzultzea. Goizeko 10.00etan geratu gara.

Mendi bizikletako modalitateak

2006-10-30T16:15:00.000+01:00

Zortzi dira mountain bike edo mendi bizikletak dituen modalitateak. Egia esateko, zaila da askotan ondo bereiztea modalitateak, hibridoak ere agertu direlako. Dena den, garrantzitsuenak hemen daude. Bakoitzaren ezaugarriak ere ikusiko ditugu.

X Countrya (XC), cross country edo rallya. Mendi bizikletak duen modalitaterik zabalduena. Bizikletak 100 mm.ko urkila izaten du modalitate honetan. Bizikletak zurrunak zein suspentsio bikoak izan daitezke. Herri eta basoetatik zehar ibiltzea da kontua, hau da, ingeleshiztuen esaten duten bezala, country edo landa zein basoetarako dira, pisu txikikoak eta aldapan gora errendimendu handikoak izan behar direnak. 7-10 kilometroko zirkuitoak erabili ohi dira rally lehiaketak egiteko.
Enduroa. Cross country eta freeride modalitateen artekoa. Bizikletek 130-165 milimetroko urkilak dituzte. Aldapan behera egokiro joateko bizikletak ere badira izan. Enduroa mendian praktikatu ohi da bide harritsuen artean sarritan, eta motoetan ere modalitate arrakastatsua da.
Freeride-a. Muturreko modalitatea. Bizikletak ondo prestatuta egon behar dira, 160 mm.tik gorako urkilekin. Megavalanche azpimodalitatean 8-10 kilometroko jaitsierak egiten dira.
Maratoia. Suspentsio osoko bizikletekin praktikatzen da rally moduko modalitate hau. Bizkletak 100-120 milimetroko urkilak dituzte. Maratoian, ibilbide luzeak egiten dira, sarritan 80 kilometro baino gehiagokoak.
Duala edo dual slalom-a. Bi txirrindulari aldapan behera abiatzen dira dintantzia laburreko parez pare doazen ibilbideetatik zehar, nor baino nor arinago.
Downhilla edo jaitsiera. Modalitate honetan aldapan behera egiten du txirrindulariak. Banan-banan irteten dira ziklistak eta kronometroaren aurka egiten dute ahalik eta azkarren jaitsiz. Behin, behean, teleaulkiak hartzen dituzte tontorrera berriz ere igotzeko.
Street, urban edo kaleko modalitatea. Hiri eta herriko kaleak eta monumentuak aprobetxatzen dira bizikleta erabilita beraietatik zehar trebezia erakusteko.
Road edo errepidea. Bidegorri zein errepidetik ibiltzea da. Gurpilak meheagoak izaten dira rozamendu gutxiago edukitzearren. Bizikletak zurrunak edo suspentsio bakarrekoak izatea nahikoa da errepideko modalitatea praktikatzeko.

Seguro asko norberak badauka bat gurago duena. Kontua ondo pasatzea da eta ariketa fisikoa egitea. Mendi bizikleta maite dutenek ziur dutela bat, besteen gainetik maiteago dutena.

Serantes mendirako ibilbide zapuztua

2006-10-29T14:22:00.000+01:00

Gorkak zorte txarra dauka aspaldi honetan. Gaur goizean, gurpila zulatu zaio Serantes mendirako bidean. Guztitara bost joan gara: Urtzi Altube, Iñaki, Fermin, Ricardo eta Gorka. Urtzi Altuberekin Areetan geratuak ginen eta bakarmena eskatu behar diogu beranduago agertu garelako pintxazoa zela-eta. Hona hemen argazkiak. Konturatuko zaretenez, Galeako muturrean laino itzela zegoen. Tamaina handian ikusteko, klik egin behar hautatutako argazkian.

Akarlandara Sustatxa-Unbetik zehar

2006-10-22T20:32:00.000+02:00

Gaur goizean, Erandioko Akarlanda parkera irten gara goizeko 10.15etan. Fermin, Ricardo, Iñaki, Kepa eta Gorka abiatu dira 13.00etan itzultzeko helburuarekin Unai Basurkoren beluntziaren irteera ikusi nahi genuen-eta. Guztitara 22 kilometro egin ditugu, Iñakik zenbaturik. Tamalez, neuri katea apurtu zait Akarlandara heldu bezain laster eta Iñakiri gurpila zulatu zaio ibilbidearen amaieran. Getxoko batzokian freskagarriak hartu ostean, Galeara joan gara belauntzien irteera ikusi ahal izateko. Egun ederra eta giro ezin hobea Galean. Hona hemen ibilbidean hartutako argazki batzuk:

Akarlandan barrena, Erandio herrian

2006-10-19T09:36:00.000+02:00

Datorren igandean, urriaren 22an, goizeko 10.00etan Akarlanda parkera joango gara. Irteera berri bat roam modalitatea praktikatzeko. Badakizuen bezala, roam egiten dugunean bide berriak zabaltzen saiatzen gara, eremuak aztertzera joaten gara, bideak urratzen ahalegintzen gara. Beti bezala, Aixerrota ondoko aparkalekutik irtengo gara eta Fadurako bidea hartuta, Erandiko Akarlanda parkera abiatuko gara. Gogora dezagun, Akarlanda Euskal Herriko Unibertsitatetik hurbil dagoela. Beheko irudian X letraren bidez Akarlandako goiko sarrera agertzen da, mapan kokaturik. Leioa-Unbe bidean. Politika bezala, bide berriak urratzea ezinbestekoa da jendearen gogoak berriztatzeko. Espero dezagun bide polita egitea eta euri askorik ez edukitzea. Erne egon gaitezen eguraldi iragarpenei. Badakikezuenez, eskumako zutabean dituzue lotura bi zer-nolako eguraldia egongo den jakiteko (zutabearen behekaldean).

Uribe Kostan zehar

2006-10-15T22:42:00.000+02:00

Gaur goizean, Aixerrota taldeko hainbat kidek festa luzea hartu dutela-eta, hiru animatu egin gara azken momentuan mendi bizikletaz irteteko. Kepa, Iñaki eta hiruok Aixerrotatik Isertegirainoko bidea egin dugu. Joanean ordubete eta hogei minutu tardatu dugu bide hori eginez, hau da, Getxotik Barrikako Isertegiko muturreraino. Eguraldia ezin hobea izan da eta Julio deritzon lagun batekin topo egin dugu. Iñakiren laguna da Julio. Hona hemen argazki batzuk. Beraietan klik eginez gero, tamaina handian ikusi ahal dira.

Shimano XTR, urrian eskuragai

2006-10-09T22:02:00.000+02:00

Hilabete batzuk itxaron ondoren, aurtengo apiriletik hain zuzen ere, azkenean badirudi urrian Shimano XTR berria edukiko dutela mendi-bizikleta dendetan. XTR berriak aukera emango digu bi pinioi mugimendu batez batera aldatzeko eta pedalierrean titanioa eta karbonoa sartuta pisua txikitzea lortu dute. Desbiadoreetan aldaketa handirik ez dago. XTR berriak aurre egingo dio hain ospe handia lortu duen SRAM markaren X.0 deritzonari. Enpresa japoniarrak findu nahi izan du goiko mailako aldagailu sistema, haiek dioten bezala, engineered for the way you ride (egina bizikletaz ibiltzeko duzun modurako) lelopean. Ikus dezagun ondoko argazkian, XTR piezak eta beherago aldagailu berria.

Galdamesko bide berdean zehar

2006-10-08T16:55:00.000+02:00

Gaur goizean, Aixerrota MTB taldeko hiru kide, Kepa, Iñaki eta Gorka, Gallarta-Galdames bide berdea egiteko irten gara goizean goiz Aixerrotako aparkalekutik. Goizeko 9.15etan abiatu gara Gallarta herrira. Bigarren irteera da, bertara egiten duguna, abuztuaren amaieran beste bat egin genuelako. Getxoko irteera gunean, sorpresa eduki dugu Isidorok bisita azkarra egin digulako. Gainera Asier bizikletazalea aurkezteko aukera eman digu. Gero eta gehiago gara elkarte xume honetan. Ongi etorriak izan daitezen guztiak.

Gaurko eguna oso aproposa izan da Gallarta bisitatzeko, zeren bertako Burdin Jaia ikusteko aukera eduki baitugu. Meatzariak, idiak, titiriteroak, antzinako harginak... Festa ederra Meatzaldeko ohiturak-eta ikusteko eta antzinako aroetan barna bidaiatzeko. Museoa ere ez da falta izan eta bertan egon gara meatzarien historia berrikusten. Egun gogoangarria.

Hona hemen gaurko argazki batzuk (klik eginez gero, tamaina handian ikusi ahal dira):

Bizikleta festa Oiartzunen

2006-10-06T23:07:00.000+02:00

Oiartzun herrian bizikleta festa ederra egin zen orain dela gutxi. Oiartzundarrek, gazteak zein nagusiak, txikiak zein profesionalek, bizikleta hartzeko parada eduki zuten eta festa handia montatu. Argazkiak ikusi eta artikulua irakurri nahi baduzue, Oiartzungo gazteen blogean topatu ahal duzu dena.

Trek demo 2006 Barakaldon Getxo Zikloak dendaren eskutik

2006-10-05T23:16:00.000+02:00

Mezperrekan dagoen Gorostitza kiroldegian geratu ginen mendi-bizikletazale batzuk Trek Subaru Demoko bizikletak probatzeko. Ibilbidea bertan hasi eta Zugaztieta (La Arboleda) herriraino joan behar zen Getxo Zikloak dendak eta Trek markak antolatuta. Igande goiza zen, egun ederra txirringaz ibiltzeko eta aukera ezin hobea Trek bizikleta berriak probatzeko. Ez da nolanahikoa 3.000 euro inguruko bizikletak probatu ahal izatea! Getxo zikloetako Unai Allendek oso ondo antolatu zuen guztia. Amaieran gozokiak, edariak eta fruitu lehorrak banatu zituen getxoztarrak. Gainera Getxo Zikloak marka zeraman txirrindulari kamiseta ezin hobea ere oparitu zigun bertara joan ginen guztioi.

Tamalez, egunak zoritxarra eman zuen: gutako batek itzelezko erorikoa eduki zuen eta anbulantzia etorri behar izan zuen Zugaztieta herriraino. Ospitaleko larrialdi zerbitzuetara eraman behar izan zuten laguna. Erorikoa handia izan arren eta aurpegiko masailan kolpe izugarria jaso zuen arren, pozik joan ginen guztiok etxera azken berrien arabera hobeto baitzegoen ospitalean. Bihoazkio lerro hauetatik gure gomuta eta uxala berriro ere gertatuko ez balitz. Bestalde, eskerrak ematen dizkio Oscar-i erakutsitako ibilbide zoragarriagatik La Cruz tontorretik zehar. Handia da benetan horrelako kide baten ondoan joatea.

Hona hemen igande goizean hartu nituen irudi batzuk (klik eginez gero, tamaina handian ikus daitezke argazkiok):

Zuberoren dendan, aholku bila bizikleta aukeratzerakoan

2006-10-01T21:40:00.000+02:00

Luis Zubero arratiarraren dendara jo dut. Bilboko Diputazio kale zentrikoko 3. zenbakian dago eta Ciclos Zubero du izena dendak. Bertara joan naiz erosleek eduki ohi duten zalantza bat argitu nahian. Adituen aholkua beharrezkoa dugu, bizikleta asko baitaude merkatuan, oso desberdinak direnak: suspentsio bakarreko bizikletak eta suspentsio bikoak, zein erosi, hor dago zalantza. Suspentsioa izaten da bereizgarritasunaren seinale sarriro. Dendan, Dorleta dago kutxan eta Luis eta Iker bizikletak konpontzen topatzen ditugu. Atsegin handiz, lanari uzten diote eta egiten diegun galderari erantzuteko prest ageri dira. Azken buruan, egiten diedan galdera, gomendioa da; bizikleta gogor eta suspentsio bikoen artean aukeraz. Honako erantzuna ematen digute:

"Suspentsio biko bizikleten salmenta nagusitzen ari da gaur egun. Prezioari dagokionez, 1000 euro ingurukoak dira eta edonondik ibiltzeko balio dute. Suspentsio bikoen abantailak honakoak dira: erosotasuna, bizkarrerako hobeak, seguritate handiagoa ematen digute eta aldapan gora eta behera egokiagoak dira. Suspentsio bakarrekoak rallyetarako erabiltzen dira eta merkeagoak topa ahal ditugu gehienetan, nahiz eta garestiak ere badiren."

Beraz, badakizue zein den adituaren gomendioa bizikleta gogorra, hau da, suspentsio bakoa edo bakarrekoa, edo suspentsio bikoa erosteko zalantzatan egonez gero.

Salburuako ibilbidean zehar

2006-09-23T23:19:00.000+02:00

Gasteiz hiri laua da eta bertan perimetro berdea ari dira osatzen apurka-apurka. Oso ideia ona eta erakargarria edonorentzat. Oinezkoentzat zein bizikletazaleentzat, horrelako lanak fruitu onak izango ditu zalantzarik gabe turismoan eta politikoki ere errentagarria izango da. Gasteiz-ek ederto planifikaturik dauka eranztun berdea deritzona: hiriaren ertzean bidegorri eta bidehori sortzea 40 kilometro inguru bizikletaz egin ahal izateko.

Larunbat arratsaldean, goizean gogor lan egin eta gero, Kepa eta biok eranztun berde horretako Salburua ezagutzera joan ginen, bizikletak furgonetan ipinita. Oso eguraldi ederrarekin topatu ginen eta Elorriagan aparkatu eta gero, abiatu egin ginen Arkaute eta Elgorriaga herrietan barna doan ibilbide berdea, Gamarraraino heltzen dena, egitekotan. Guztitara 36,2 kilometro egin genituen Gasteizko ekialdea eta ipar-ekialdea ondo ezagutuz eta bertan egin dutena dastatuz.

Ibilbidea hasteko leku aproposa da Elgorriaga herria. Bertan hotel zoragarria dago XVI mendeko eraikin baten oinarrian dagoena eta non kafe ona ematen duten. Kafe ona edukitzeaz gain, antzinako ardandegi baten antza daukanez, ikusgarria da zinez. Bertan utzi ahal da aparkaturik autoa edo furgoneta, argazkian ikusten duzuen bezala. Hotel-jatetxeak Palacio de Elorriaga izena dauka. Tamalez, bizikletak furgonetatik jaitsi eta berehala konturatu zen Kepa bere txirringa pintxaturik zegoela. Horrexegatik ikusten dugu beheko argazkian Kepa zulatze hori konpondu nahirik.

Hurrengo bi argazkietan honakoa ikusten da: ibilbidean zehar erabiltzen dituzten seinaleak mendigoizaleak eta txirrindularik gal ez daitezen, ezkerreko argazkian. Eta Kepa bidearen hasieran (tamaina handian ikus daiteke baldin eta argazkiotan klik eginez gero) eskuinekoan.

Behin Palacio de Elorriaga hoteletik kilometro eta berrehun metro ibili eta gero bide berde horren harreragunea topatzen dugu. Oso neska jatorra eta euskalduna topatu genuen bertan, Leire izenekoa, informazio ederra ematen ziguna. Beheko ezkerreko argazkian ikusten den bezala, oso polito daukate harreragune ondoko bidea. Eskumako argazkian, harreragunea bera ageri da, larunbat eta igandeetan zabalik dagoena. Turistak bertan informazio ederra aurkitu ahal du bertako hegaztiei buruz eta bidegorrien gainean.

Ibilbidean bidegorritik goaz eta baita bidehoritik ere, hau da, nekazal bideen antzeko harritxuak dituzten bideetatik zehar. Alegria ibaia eta Arkauteko fadurak ere ikusten dira bizikleta bidetik paisaia ederragotuz.

Beheko argazkian Kepa ageri da Lizarraga deritzon hegazti-behatokitik. Tamalez, Los fresnos izena jarri diote lekuari jatorrizko euskarazko izenaz ahaztuta. Las Zumas izena dauka beste behatokiak eta izen horrekin ere ez dute asmatu arduradunek, nire ustez. Herrialde diglosikoan bizi garelako seinale. Euskaldunon zeregina kexatzea da eta euskarazko izen jatorrizkoa proposatzea: Zumeta. Eskuineko argazkian, Kepa ikus dezakegu pedalei eraginez bideska berde-horian zehar.

Beheko ezkerreko argazkian ni-neu agertzen naiz ibilbideak dituen egurrezko zubi polit batetik zehar pasatzen. Zubiak oraindik eraikitzen ari dira eta benetan gustuz daude eginda. Eskuineko argazkian, ostera, Kepa agertzen da Alegria ibaiaren ondoan iparraldeko alderdian.

Hona hemen, egindako azken bi argazkiak. Ezkerrekoan Tau Baskoniaren saski-baloi pabilioia ageri da.

Getxotik Serantes mendiraino

2006-09-20T09:39:00.000+02:00

Ibilbide honek bi zati oso ezberdin ditu:

*Getxotik Santurtziko kaiaraino (Bizkaia Zubitik) eta itzulia (bide berbera erabiliko dugu) oso erreza eta lasaia da. Getxon, bidegorria erabiliko dugu eta Bizkaia Zubitik Santurtziko kairaino hiriko kaleak/errepidea.

*Santurtziko kaitik Serantes tontorreraino bidea aldapa bihurtzen da. Hasieran (1,5 km inguru) Santurtziko kaleetatik eta gero hormigoizko pista erabiliz (4,5 km ). Aldaparen ehunekoa 6,80koa da ia igoera osoan. Azken 600 mt %13koa da. Bai, pixka bat gogorra, baina gailurra hurbil dago eta aurrean izango dugun bistak (itxasadarra, kaia, Getxo, Areeta, Bilbo, Trapaga ....) ahalegina merezi du.
Guztira 32 km izan dira, arazorik gabe, edozein goizetan egiteko. (pedaletan aritzeko 2 ordu )

Getxoko bizikleta martxako argazkiak

2006-09-19T14:00:00.000+02:00

Bizikletaren erabileraren alde egiteko, Getxoko udalak Areeta-Algorta-Areeta bizikleta martxa antolatu zuen igandean. Bertan egon ginen Aixerrota elkarteko Iñaki eta biok. Hona hemen argazki batzuk, bertan egindakoak. Zorionak Bilbao Aseguruak konpaniakoei opariagatik eta horrelako ekitaldi batean laguntzaile izateagatik. Argazkietan klik eginez gero, tamaina handian ikus daitezke.

Sanzena bidea Martiarturaino

2006-09-17T23:57:00.000+02:00

Gaur goizean bi ekitaldi eduki ditugu, alde batetik Aixerrotatik Martiartura abiatu gara. Behin Martiartura helduta Areetako bidea hartu dugu Getxoko bizikleta martxan present egoteko.

Kondaketa:
Aixerrotatik Martiartura 8 kilometro daude eta bidea oso laua da. Lehenengo Zientoetxe bidea hartu dugu harik eta Muru estartara heldu garen arte (1,25 kilometro Aixerrotatik). Gero Murutik Fadurako bidea hartu dugu Larrañazubirantz. Hortik hasten bidea aranean zehar Santa Kolomako baselizara doana. Baseliza eskuinaldean lagatzen dugu eta zuzen segitzen dugu oso trafiko gutxi duen errepidetik Martiartuko torrea ikusi arte. Kaminoaren amaieran katea dago azken baserrian eta behera egin dugu landan zehar erreka paretik joateko. Erreka segitu dugu torrerako bidean eta tramo txiki bat basotik pasatu ostean, Martiartu ondoko aldapa igo dugu goiko argazkia egin eta berehala, oso aldapa motza eta golfean praktikatzeko zelai baten ondotik pasatzen dena. Horrelaxe bete dugu bidea eta zortzi kilometroak, Ricardo Sanz gida eraman dugula. Ricardorekin Fermin, Endika, Iñaki eta Gorka joan dira.
Beheko argazkietan Martiartu ondoan agertzen gara. Lehen argazkian Martiartuko probakotiaren ondoan. Horren azpian torrearen ondoan gaude. Eta eskuinaldekoan Fermin eta Ricardo Artatza auzunean autobidea zeharkatzen zubitik. Horien azpian Leioan ageri dira Ricardo, Endika eta Iñaki. Argazkietan klik eginez gero, 800x600 tamainan ikusi ahal dira.

Irailaren 17an bizikleta nagusi Getxon

2006-09-15T21:48:00.000+02:00

Igandean, Areetako trengeltoki plazatik irtengo da bizikleta martxa, Getxok urtero antolatzen duen autorik gabeko asteko ekintza bezala. Eguerdiko 12.00etan abiatuko da bizikletazaleen martxa Areeta auzunetik, oinak, garraio publikoak eta bizikletak erreibindikatzeko eguna delako Europako hainbat hiritan, aurreko artikulu batean komentatu nuen bezala.

Martiartuko bidea arakatuz

2006-09-14T00:43:00.000+02:00

Datorren igandean, irailaren 17an, mendi bizikleta irteera bat egingo dugu Bolue-Martiartu bidea eginez. Ricardo Sanz kideak markatuko du bidea eta kronografoa eta mapak eramango ditugu MTB bide hori arakatzeko, mendi bizikleta deritzon kirol honen gauza politenetarikoa eginez: ROAM. Ibilbide honen eragozpen fisikoak eta teknikoak ertain-altuak dira. Nahiz eta euria egin, joan egingo gara (txaparrada eta ekaitza egonez gero, ez, jakina). Igandeko 10.00etan irtengo gara Aixerrotako aparkalekutik. Etorriko direnei gogoratu nahi diegu ezinbestekoa dela kaskoa eramatea.

Oharra: Bolueko argazkia Tomi Etxeandia irakaslearena da. Eskerrak bihoazkio hemendik.

Getxo, autorik gabeko hiria aste batez

2006-09-13T09:26:00.000+02:00

Irailaren 16tik 22ra Getxo autorik gabeko hiri bihurtuko da. Europako 320 herri eta hirik ere egiten dute ekitaldia herritarrei gogorarazteko larregi erabiltzen dugula autoa geure hirietan. Mobilitatea beste modu batez ere sustatu ahal da eta horien artean bizikleta ageri da aukera modernoa bezala. Hiri aurreratuetan mendi bizikletak txirringen aroari aire freskua ekarri dio txirrindularia seguruago doalako bidegorri eta MTB bideetatik. Amerikako Estatu Batuetan IMBA elkartea (International Mountain Bike Association) ere sortu da mendi bizikleta erabiltzaileen interesak mundu osoan defenditzeko eta dagoeneko munduko hainbat herritan ari da lanean. Asko falta zaigu Estatu Batuek, Kataluniak edo Holandak duten MTB bide sarea edukitzeko baina dagoeneko zerbait egiten hasi gara hemen parajean: BTT zentroak, bidegorri sarea eta abar.

Mountain bike-aren munduak bizikleta salbatu duela, bistan da. Errepideko bizikletaren praktika gero eta arriskutsuagoa bihurtzen ari zelako. Orain, autobideak gero eta gehiago izan daitezen eta zabalagoak nahi ditugu. Aurten bi errei edo ildo ditugu eta biharamunean hirugarren erreia egiteko pentsatzen dugu trafikoa gero eta ugariagoa delako. Errepideak jan egin gaitu eta tamalez, trenak ere ez du erakarri jendearen arreta abiadura handikoak sortu ez ditugulako. Zenbait sasiekologistak ere trena ahaztu dute erabat eta auto eta errepideetan baino ez dute pentsatzen, orain dela gitxi egiaztatu ahal izan dudan moduan. Aisialdiaren aroan bizikleta sustatu behar dugu ahaztu gabe gure herria sendoa dela esparru honetan, bizikleta ekoizle bezala: Orbea, BH, Conor... bizikleta marka ospetsuak eta nazioarte mailan zabaldu direnak, Mikel Indurain eta beste izen batzuk munduan zehar eukaldunon berri eman dutenak eta abar.

Beraz, autoaren aroan, autorik gabeko hiriak ekintza ongi etorria izan bedi. Gehientsuok autogidariak garen aroan ere, bestelako mobilitatea dagoela gogorarazteko balio behar du horrek. Hori dela-eta, bizikletak har ditzagun Uribe Kostako herritarrok egun horietan ahal den neurrian. Gorputzak eskertu egingo digu ezbairik gabe. Lanera joateko zein naturaz gozatzeko, bizikleta gure bihotzean.

Kideon itsulapikoa sortu dugu

2006-09-11T19:44:00.000+02:00

Behin igandeetako ibilbideak amaitu ostean, freskugarriak eta garagardoak edatera joan ohi gara Javier Gorroñoren Getxoko batzokiraino indarrak hartu nahian. Kontsumizio horiek ordaintzeko 10 euroko sosak batzea erabaki dugu. Beraz, gure webgunean eta eskuineko zutabean Kideen itsulapikoa ikusiko duzue hemendik aurrera; horrela, geratzen den dirua kontrolatzeko. Agian lortzen dugu egunen batean bazkari ederra egitea... Uxala horrela izango balitz! Kutxazaina, oraingoz, artikulu honen egilea da.

Enarena bidea, Getxoko kostaldean zehar

2006-09-10T16:12:00.000+02:00

Gaur berton, bostgarren ibilbidea egin dugu Aixerrota MTB elkartean. Iraileko igande eguzkitsu honetan Aixerrota-Martiturri-Fadura-Algorta-Areeta ibilbidea egin dugu. Hona hemen zenbait argazki, egindako 24 kilometroetan zehar burututakoak. Argazkiak 1280x960 tamaina zabalean ikusi ahal dira baldin eta klik egiten baduzue beraietan. Beheko azken argazkian beste tamaina batean ipini behar izan dut argazkilari eztrebeak eskua ipini zuelako kamara aurrean (eskerrak moldatu naizen, argazkia salbatzeko zeren gixajoak ez zuen asmatzen argazkia egiten, halafede!). Hasteko, lehen bi argazkiak hementxe berton daude pixka bat moldaturik Gimp programaz komiki bateko pertsonaiak izango bagina bezala (moldaturiko errealitatea, heroiak bagina bezala igande batez):

Beheko argazkian, Alfredo agertzen da Fadurako iturriaren ondoan. Fadurako kiroldegiaren atzekaldean Iturgitxi erretegirako bidea dago eta bidegorriarekin bat egiten duen gunean iturri ederra dago atseden hartzeko.

Hurrengo argazkian, bederatziok agertzen gara Zugatzarteko gunean Getxoko hondartzetan zeharko bidegorria hartzeko momentuan.

Segidan, ibilbidearen zehaztasunak jarriko ditugu, guk bezalaxe, beste batzuek ere egin dezaten. Ibilbideak Endika Enaren izena darama. Horregatik ipini diogu Enarena ibilbidea, berarena izan baita ideia Goñi, Ibarrengoa eta Martiturri estartak aukeratzeko.

Ibilbidea: Enarena ibilbidea
Nondik nora: Aixerrota-Martiturri-Fadura-Algorta-Areeta
Distantzia: 24 kilometro (joan-etorria)
Eragozpen maila fisikoa: baxua
Eragozpen maila teknikoa: baxua
Erretako kaloriak: 238
Bataz besteko abiadura: 12,9 k/o
Gehienezko abiadura: 29,9 k/o

Kronograma:
Irteera. Aixerrotako aparkalekua (Getxo)
0.9 kilometro: trenbideko barrera Getxoko Goñi kalean.
3.4 kilometro: Fadurako iturria rugbyzelaiaren ondoan
3.9 kilometro: Fadurako kiroldegiko sarrera nagusian
6.3 kilometro: Zugatzarte etorbidean bidegorri ondoan
9.0 kilometro: Algortako portuko aparkalekua
11.2 km: portu berriko kaiaren muturra
14.9 km: Areetako bidegorriaren amaiera
19.8 kilometro: Fadurako kiroldegiko sarrera nagusia
22.10 km: Martiturri estarta
22.7 km: Goñi kalea, Europa ikastetxearen ondoan
24 km: Aixerrotako aparkalekua

Kondaketa
Goizeko 10.00etan irten gara Aixerrotako aparkalekutik. Oraingo honetan 9 kide egon gara: Iñaki, Endika, Alfredo, Ricardo, Fermin, Nati, Xabier, Isidoro eta Gorka. Berehala jaitsi gara Gustavo Adolfo Becquer kaletik bidegorri zatia hartuz Aingeruaren etorbidean barrena Bentako aldapa jaitsiz. Behin Bentako kurtzera helduta eta bidegorri zatitxoa amaituta, trenbideko barreretaraino abiatu gara. Tamalez, trena pasatzeko zegoen eta gelditu egin behar izan gara. Orduantxe Endika Enaren ideia: Goñi kalea hartu eta Ibarrengoa estartatik zehar Martiturriko bidegorrirantz. Esan eta egin. Guztiok ados, Goñi kaleko aldapa txikia igo eta Gomez Uranga kalera irten gara. Gero, jaitsi errepidetik beheraino, baina trenbideko zubipera heldu bezain laster, ezkerrera egin dugu Ibarrengoa eta Martiturri estartak hartzeko. Horrela, autorik gabeko bidetik joan gara Martiturriko estartaren amaieran bidegorria hartzeko. Berango ondotik pasatu gara eta errepide nagusiaren paretik bidegorritik zehar, Faduraraino iritsi gara. Iturrian, ur freskua hartzeko aukera egon da (bertan egin diot argazkia Alfredori). Fadurako kiroldegia pasa ostean, bidegorritik segitu dugu Txopoeta etorbideko bidegorria eginez harik eta amaiera baino apur bat arinago eskuinera egin dugun arte. Orduantxe hartu dugu Zubiondo kalea eta Asuako bidea pasatzeko semaforoan itxaron ostean, Cervantes kalera irten gara Zugatzartera heldu nahian. Zugatzarte etorbidea zeharkatzeko errepide azpiko pasabidetik joan behar (astiro eta kontuz joan behar oinezkoak egon ohi direlako). Horrela, etorbidea pasa ostean eta ausartak Zugatzarteko eskilarak txirringaz jaitsi ondoren, Neguriko pasealekuko bidegorria topatzen dugu (bertan, argazkia atera zigun herkide batek asko kostata; goian dago argazkia zeharretara ipinita). Bidegorria hartzen dugu, eskuineko aldera joz, Algortako porturaino. Algortako portuko aparkalekura helduta, berriz ere bide beretik goaz kirol porturako bide hartu nahirik. Kirol portuan sartzen gara behin bidegorria atzean utzita eta kai berria ezagutzeko kutiziari muzin egin barik, bertara goaz kaiko muturreraino, atseden apur bat hartzeko. Leku lasaia da kaia eta patinatzailez eta herritarrez beterik gaur bezalako egun eguzkitsuan. Kaitik bidegorrira berriro ere. Arriluzeko portuan berriz hartzen dugu bidegorria eta Areetako bidegorriaren amaieraraino abiatzen gara. Bizkaia zubi eskegi ondotik pasatzen gara eta Iberia parean, non bidegorria amaitzen baita, berriz ere buelta egiten dugu bide beretik Zugartzarteko guneraino. Zugatzarteko etorbidea berriro ere zeharkatzen dugu pasabidetik kontu handiz eta etorri garen bidetik Aixerrotako bidea hartzen dugu 24 kilometroak eginez: 12 joateko eta beste horrenbeste itzultzeko. Ibilbide ederra Enarena!

Bostgarren irteera, Aixerrota-Areeta ibilbidean

2006-09-07T16:59:00.000+02:00

Datorren igandean, irailaren 10ean eta goizeko 10.00etan abiatzeko, Aixerrota aldean geratu gara beste ibilbide bat egiteko. Kasu honetan Aixerrota-Fadura-Algortako portua-Areeta bidea egingo dugu. Oso erraza da eta Getxoko hondartzak ezagutzeko aukera ezin hobea edukiko dugu. Eragozpen maila oso baxua da eta bidegorritik eta errepide tramo zenbaitetatik zehar joango gara. Hortaz, Aixerrotako aparkalekuan, beti bezala, goizeko 10.00etan, igandean.
Bestalde, laster Mendatako BTT zentrora egingo dugu bidaia Gernikaldeko ibilbideren batetik ibiltzeko. Erne ibili, zeren urriaren 15erako ibilbide ederra espero baita Mendatako harreragunean, Mendatatik Oiz-eraino. Mendibizikletazaleok batu gaitezen!

Trek Fuel 80, zeharo merketurik

2006-09-07T16:06:00.000+02:00

Getxo Zikloak izeneko dendak eskaintza ona egiten du orain, uda osteko garaian, Trek marka kaliforniarrean. Fuel 80 suspetsio biko bizikleta 1099 eurotan dago salgai orain. Aukera polita da Fuel 80 eredua erosteko, 1300 euroko prezioa eduki duena. Argazkian klik eginez gero, tamaina handian ikus daiteke. Aldagailua Shimano XT da eta txirringak 27 abiadura ditu, hau da, 3x9. Fuel 80 bizikletak disko galga hidraulikoak dauzka Shimano Deore markakoak. Ez dago gaizki, aldapa guztiak, errazak zein gogorrak, igoteko. Trek Espainiak 2006 urteko bizikleten prezioa beheratu du 2007koak merkaturatzeko hainbat arinen. Unai Allendek esan digunez, Trek-Subaru demoan 2007ko Trek eta Gary Fisher bizikletak probatzeko aukera izango dugu. Eta hori laster da, aurreko artikulu baten komentatu dugun bezala. Demoko bizikletak, Madrildik etorriko direnak ere oso beheraturik erosi ahal dira. Aukera, paregabekoa da, Trek bizikleta ospetsuak merke erosi ahal izateko. Gogora dezagun Getxo Zikloak Ollarretxe kalean dagoela, Algortako Fadura auzunearen ondoan.

Busturialdeko BTT zentroa

2006-09-05T12:21:00.000+02:00

Euskal Herriko Autonomi Elkartean mountain bike zentro bakarra dago Busturialdean. Eusko Jaurlaritzak Arabako teknologigunean, Miñaon hain zuzen, jarri du MTB bulego teknikoa. Ideia ona da, Euskal Herrian mendibizikletazaleentzako ibilbideak faltan ditugulako. Gure herria agian ez da Holanda bezain aurreratu bidegorri eta MTB zentroen alorrean, baina hasiak gara zerbait egiten. Busturialdekoak Mendata herrian dauka harrera gunea. Guztitara 10 ibilbide daude Busturialdean eta 226 kilometro mendi bizikletaz lasai ibiltzeko. Ibilbide gogorrak, zein errazak, zein maila ertainekoak... guztientzat aproposak izan daitezkeenak. Urdaibai ezagutzeko ere parada ezin hobea ematen du ekimen honek. Informazio gehiago lortzeko EuskadiBTTzentroak.com gunean sartzea da onena. Zehazki, Mendatako Eleixalde auzoan (zenbaki gabe) topatzen da harrera gunea. Telefonoa honakoa da: 946257204. Astean zehar, salbu eta astelehen eta asteartean, zabalik dago asteazkenetik igandera honako ordutegian:
goizean, 9.00etatik 13.00etara
arratsaldean, 15.30etatik 19.30etara

Gorrondatxe-Areeta bidea

2006-09-04T10:22:00.000+02:00

Gorrondatxe-Areeta bidea erraz egiteko ibilbidea da. Agian, batzuentzat luzeegia izan daiteke 29 kilometro direlako. Kilometroak, baina, konturatzeke burutzen dira eremua nahiko laua delako. Goizeko 10.30etan hasi eta eguerdiko 12.30etarako amaituta egon daiteke. Atzo egin genuen bidea Kepak eta biok. Ondoren ibilbide honen fitxa dator.

Ibilbidea: Gorrondatxe-Areeta
Distantzia: 29 kilometro
Eragozpen maila: baxua
Erretako kaloriak: 304
Bataz besteko abiadura: 14,4 k/o
Gehienezko abiadura: 34,4 k/o

Kronograma:
Irteera. Aixerrotako aparkalekua (Getxo)
2.15 kilometro: faroko aparkalekua
4.50 kilometro: Gorrondatxeko aparkalekua
4.71 kilometro: Goienetxe estartaren hasiera
7.39 km: Kortiñeko kurtzea
8.54 km: Aixerrotako aparkalekua
9.50 km: Andra Mariko trenbideko barrerak
12.18 km: Fadurako kiroldegiko sarrera nagusia
13.86 km: Zugatzarteko semaforoa
16.29 km: Algortako portu zaharra
20.22 km: Areetako muturra (bidegorriaren hasiera, Iberia parean)
24.90 km: Fadurako kiroldegia
27.68 km: Andra Mariko trenbideko barrerak
28.29 km: Getxoko batzokia
29 km: Aixerrotako aparkalekua

Kondaketa:
Aixerrota ondoko aparkalekutik irten gara, alboko lehen argazki honetan ikusten den bezala. Aixerrota, orain, arte aretoa da eta atxikita dagoen eraikinean jatetxe dotore eta garestia dago. Metro batzuetara labarra dago, eta bertatik, Arrigunagako hondartza eta Abra osoa ikusten da. Oso leku polita Aixerrota-Galea aldea, eta asteburuetan jendearen pasealeku bihurtzen dena, bai txirrindularientzat, bai oinezkoentzat. 2006. urtean bidegorri eta oinezkoentzako bidearen beste tramo bat zabaldu dute eta orain posiblea da faroraino bidegorriz heltzea.

Aixerrota-Galea erraz egiten da tramo osoa bidegorria delako. Desnibel apur bat dago, baina plater txikiagoa ipinita, dena konponduta dago. Horrela, Galeako forteraino heltzen gara, non iturri galanta baitago, argazkian ikusten dugun bezala. Egarri denak bertan edan ahal du edo aurpegia freskatu.

Galeako fortetik, bidegorritik segitzen dugu Aizkorriko Gorrondatxe hondartzaraino. Beheko argazkian, bidearen amaiera ikusten da. Galeatik Gorrondatxeraino, bi aukera ditugu: itsasertzeko bideskatik joan edo oinezkoeentzat den bidetik. Azken aukera hori egiten dute txirrindulari askok, baina kontutan hartu behar da oso astiro joan beharra dagoela istripurik ez edukitzeko. Bidegorria, gaur egun, faroaldeko aparkalekuan amaitzen da eta hori dela-eta, agian hobe da ahal den neurrian itsasertzetik joatea.

Behin Aizkorrin, eta aldapa txikiko metro batzuk igonda, Goienetxe estarta topatzen dugu, Galeara itzultzeko baina barneko bidetik, hau da, golfzelaiaren barnekaldetik Kortiñeraino. Bi errepide txiki eta gutxi trantsitatu gurutzatu behar ditugu eta eskuineko bideskak hartu golfzelaiaren paretik joan ahal izateko. Bidea lurrezkoa eta harrizkoa da eta aldapa gogor bat igon behar da bigarren bideska hartu bezain laster. Aldapa harriz josita dago eta nahiz eta desnibel altukoa ez izan, kosta egiten da igotzea.

Ondoren, Kortiñeko bidea hartzen dugu Galean, forteko bidetik, berriz ere bidegorria hartu nahirik. Argazkian ikusten da bidea, Galeako txalet eskergetatik pasatuz. Sakonean, Galeako gotorlekua ikusten da.

Aixerrotako aparkalekura iritsita, ezkerrera egiten dugu, bertan dagoen parketxotik bidegorria utziz eta Gustavo A. Becquer kalera irteteko. Kale horretatik metro batzuk egin eta Aingeruaren etorbidera heldu bezain laster behera egiten dugu bidegorria berriro hartuz. Tramo laburra da Bentaraino doana. Bentatik Fadurako bidea hartzen dugu. Errepidea eta bidegorria topatuz, dena da laua jada Ereaga hondartzaraino. Fadurako kiroldegiraino heltzen gara rugby zelaiaren ondotik pasatuz. Argazkian, Kepa ageri da kiroldegiko sarrera nagusiaren aurreko bidegorri zatian.

Ibilbidearen bigarren fasean, Zugatzartera helduko gara bertatik, Algorta-Areeta bidegorritik joateko. Behin, txopoeta kaleko bidegorriaren amaierara helduta, errepidearen beste aldera goaz Zubiondo kaletik barrena, semafororaino heltzeko. Semaforo horretatik Cervantes kalera goaz eta hortik, behin oinezkoentzako tunela pasatuta, Zugartzateko etorbidea pasata alegia, Getxoko hondartzetatik doan bidegorria hartzen dugu. Lehenengo Algortako porturaino goaz. Portuan egindako argazkiak dira beheko biak.

Gero, berriro ere Zugatzartera abiatzen gara bidegorrian zehar. Horrela, Areetako bidegorritik Bizkaia zubia ikusten dugu eta Iberia pareraino heltzen gara, bertan amaitzen baita bidegorria. Bueltako bidea hartzen dugu, Zugatzarte, Fadura, Goñiren gasolindegia eta Getxoko batzokia gure azken etaparen guneak izanik. Azikenean, Getxoko batzokiko Javier Gorroñoren tabernan zerbait edan eta berriz ere Aixerrotaraino azken aldapa gaindituz.

Isertegi ibilbidea

2006-09-02T16:19:00.000+02:00

Gaur, larunbatean, Kepa eta biok irten gara Aixerrotatik Uribe Kostako itsasertzetik ibilbidea aztertzeko asmotan. Ibilbidea zoragarria izan da eta kostaldetik urrundu barik joan gara tipi-tapa kilometroak eta lekuak apuntatu nahian. Isertegiko kalaraino edo Gaztelu deritzon zonaldera heltzea zen helburua. Gaztelutik Plentzia eta Gorlizko hondartzak ikusten dira eta bueltatzeko atsedengune aproposa da. Guztitara 21,5 kilometro dira eta komenigarria da bizikleta onak eramatea, hau da, 24 edo 27 abiadura dituztenak. Ibilbide teknikoa da, kaminoak batxez betetakoak baitira, gorabehera batzuekin. Beraz, eragozpen maila ertaina da eta pentsatu erraza dela 3 ordu ematea pedalei eraginez Isertegirainoko ibilbide honetan zehar. Ikus dezagun Aixerrota Isertegi bideak zer ematen duen, argazki batzuk erakutsiz.

Aixerrota (Getxo) - Isertegi (Barrika)
Distantzia: 21.5 kilometro
Eragozpen maila: ertaina, ibilbide teknikoa
Iraupena (joan-etorria): hiru ordu inguru
Kronograma:
Irteera: Aixerrota (Getxo); bidegorria hartzen da eta Galeako sarrera nagusiraino heltzen da.
1.5 kilometro.- Galeako kurtzea: eskuinetara jo behar harresia dagoen bidetik. Hona hemen kurtzea eta zelako bidea den argazkiotan:

Laugarren argazkian ageri den bidegurutzean (Kepa kidea ageri da), ezkerretara jo behar dugu Gorrondatxeko bidean barna. Bide hori Galeako golfzelaiaren paretik doa. Horrela, aurrera egiten dugu Goienetxe estarta hartuta Gorrondatxe-Aizkorri alderdira heldu arte. Hurrengo bi argazkietan Kepa ageri da Goienetxe estartako bidea hartu guran, bi errepide estu gurutzatu behar direlako.

2.90 kilometro.- Goienetxe estartak Gorrondatxe hondartzako aldaparaino garamatza. Hurrengo argazkian Kepa ageri da Goienetxe estartaren amaieran Gorrondatxeko aparkalekuaren ondoan eta Aizkorriko autobus geltoki ondoan. Beste argazkian, eskuinekoan, autobus geltokiaren aurreko aldapan zer bide hartu behar dugun agertzen da, eskuinekoa, alegia. Aldapa hori baino aput bat beherago iturri bat dago txirrindularia egarri egonez gero ur freskua edateko.

Golfzelaiaren paretik goaz, baina barnealdetik, kostaldetik joan ordez. Jende gutxiago topatzen dugu eta nahiz eta paisaiari itsasoa falta zaion, zuhaitzak-eta topatzen ditugu. Ikusi ere Aizkorri ikastetxea ikusten dugu bidetik, beheko argazkian agertzen den bezala. Munegane bidean abiatu gara eta laster heltzen da bertara.

3.70 kilometro.- Lur-harrizko bidea utzi ostean, Larrabasterrako hondartzara doan autobide zati berriaren amaiera topatzen dugu eta bidegorritik zenbait metroz jaitsi eta gero, agur egiten diogu Munegane-ri. Hona, argazkian, Landaluze bideko autobide zatia, aldapan behera.

Behin Larrabasterrako hondartzetara doan errepideko biribilgunera helduta (beheko ezkerreko argazkia), biribilguan bertan estarta bat topatzen dugu gorantz doana (eskuineko argazkia). Estarta horixe hartzen dugu Barrikako bidea hartzeko. Itsasertzetik joan ahal izateko, bide hori baita egokiena mendi bizikletaz egiteko.

Bideska horretatik aldapa erraza dugu aurrean harik eta karabanaak aparkatzen dituzten gunera heldu arte. Beheko argazkietan ikusten da gunea karabana eta surflari auto bat bertan daudela.

6.40 kilometro.- Hortik Sopelmar ikusten da, etxe asko itsasertzean eta Sopelanako hondartzaren ondoan. Behin Sopelmarko bideko aldapa igonda, argazkian agertzen den eskuineko bidea hartu behar dugu.

Sopelmar atzean utzita, Meñakotz bidea hartzen dugu:

6.98 kilometro.- Meñakotz hondartza aldera heltzen gara
7.95 kilometro.- Meñakotzgaina igon behar dugu aldapa gogorra izanik.
8.97 kilometro.- Barrikako hondartzako aparkalekua. Bertan iturria dago eta kostaldearen mapa iturri ondoan.

Arrizabale eta Txitxarro muturra pasatuta, Gaztelu aldera heltzen gara, Isertegiko kala gure ibilbidearen azken gunea izanik. Isertegi aldetik oso paisaia polita ikusten da Plentzia eta Gorliz aurrean ditugula.

Orain buelta egin behar dugu beste 10.85 kilometro eginez harik eta Aixerrota berriro ikusi arte. Bidetik, Barrikako hondartzako aparkalekuan (12.60 kilometro) atseden hartzen dugu bertako iturritik edateko eta ondoan dagoen mapari azken begiratua emateko. Bidea oso teknikoa da egoera txarrean dauden estarta eta bidesketatik zehar joan behar delako zenbait tramotan. Paisaia zoragarria da eta gero eta txirrindulari gehiago ikusten da bertatik MTB praktikatzen.

Festibike 2006, MTBzaleen topaketa

2006-09-01T17:34:00.000+02:00

Madril ondoan dagoen Tres Cantos herrian, mendi bizikletaren festa egingo dute irailaren 22, 23 eta 24an. Festibike 2006 edizioan 100 MTB erakusle egongo dira beren azken produktuak jendeari erakusteko. Aukera ezin hobea da bizikletak probatzeko eta MTBzaletuen mundua zuzenean ezagutzeko. Tres Cantos-ko parke zentralean izango da Festibike mountain bike jaialdia eta bertan MTB maratoi ospetsu bat jokatuko da: El Corte Ingles-ena, VI. edizioan. Maratoi hori igande goizean izango da. Gogora dezagun sarrerak 6 euroko balioa edukiko duela. Tres Cantos herrian bertan hartu nahi baduzue ostatua, honako helbide hauetan topatu ahal duzue zuen intereseko hotela:

Hotel Quo Fierro****
Pza. de la Estación, 2
Tfno: 91 804 48 37

Hotel Holiday Inn Express Tres Cantos***
Ronda de Poniente, 16
Tfno: 91 803 99 00

Hotel Jardín de Tres Cantos***
Avenida de los Encuartes, 17
Tfno: 91 806 49 99

Hostal Tres Cantos***
Avda de Viñuelas, 39
Tfno: 91 803 71 17

Uribe Kostako bizikleta dendak

2006-08-31T15:44:00.000+02:00

Artikulu honetan, Uribe Kostan mendi-bizikletak saltzen dituzten guneak agertzen dira. Argazkiak ere agertzen dira, eta beraietan klik eginez gero, tamaina handian ikus daitezke.

Dendaren izena: Bicis Txofi
Webgunea: ez dauka
helbidea: Paulino Mendibil 5. Areeta (Getxo)
Telefonoa: 94-4648381
Ordutegia: astelehenetik ostiralera: 10.00-13.30 eta 16.30-20.00 . Larunbatean: 10.00-13.30
jabea: Joseba Ruiz
jabeari buruzko datuak: profesional ohia Lotus taldean, Euskadiko eta Bizkaiko MTB txapelduna.
Denda noiz sortua: 1995
Saltzen diren markak: Kona, BH, Felt eta bezeroak nahi bezalako bizikletak
Konponketak: bai
Kurtsoak (mekanika....): ez
Irteerak: eguerdiro errepideko bizikletazko ibilaldia eta noiz-behinka bestelako irteerak.

Dendaren izena: Ciclópolis
Webgunea: http://www.ciclopolis.com
helbidea: Amaia etorbidea, 12 zbk. Pinueta auzoa, Itzubaltzeta (Romo). Leioa
Telefonoa: 94-4636273
Ordutegia: astelehenetik ostiralera: 10.00-13.30 eta 16.30-20.00 . Larunbatean: 10.00-13.00.
jabea: Gonzalo Elvira
jabeari buruzko datuak: errepide eta MTB txirrindularia.
Denda noiz sortua: 1993
Saltzen diren markak: Specialized, Mondraker, Kona eta bezeroak nahi bezalako bizikletak
Konponketak: bai
Kurtsoak (mekanika....): ez
Irteerak: ez.

Dendaren izena: Ciclos Getxo Zikloak
Webgunea: http://www.ciclosgetxo.net
helbidea: Ollarretxe kalea, 1. Algorta (Getxo)
Telefonoa: 94-4300817
Ordutegia: astelehenetik ostiralera: 10.00-13.30 eta 16.30-20.00 . Larunbatean: 10.00-13.30
jabea: Unai Allende
jabeari buruzko datuak: txirrindulari ohia eta bizikleta-mekanikaria.
Denda noiz sortua: 2002
Saltzen diren markak: Trek, Gary Fisher, Yetti, Merida, Cannondale eta bezeroak nahi bezalako bizikletak
Konponketak: bai
Kurtsoak (mekanika....): oraingoz ez
Irteerak: MTB irteerak noiz-behinka.
Bizikleta alokairua: ez

Dendaren izena: Ciclos Olabarrieta
Webgunea: ez dauka
helbidea: Errekagane 22. Itzubaltzeta-Romo, Areeta (Getxo)
Telefonoa: 94-4648381
Ordutegia: astelehenetik ostiralera: 10.00-13.45 eta 16.30-20.00. Larunbatean: 10.00-13.45.
jabea: Pablo Olabarrieta
jabeari buruzko datuak: txirrindulari ohia eta mekanikaria.
Denda noiz sortua: 1983
Saltzen diren markak: Orbea, Giant, Mountain Gambier eta bezeroak nahi bezalako bizikletak
Konponketak: bai
Kurtsoak (mekanika....): ez
Irteerak: errepide-bizikletaz.
Bizikleta-alokairua: ez

Dendaren izena: Ciclos Santa Ana
Helbidea: Amaia kalea, 20. Areeta (Getxo)
Telefonoa: 94-4023125
Webgunea: ez dauka
Ordutegia: astelehenetik ostiralera: 9.30-14.30 eta 16.30-20.30 . Larunbatean: 9.30-13.30
Jabea: Raúl García (Jesús López-ekin ageri da argazkian)
Jabeari buruzko datuak: txirrindulari ohia eta mekaniko ohia Fortaleza eta beste talde batzuetan.
Denda noiz sortu zen: 1971
Saltzen diren markak: Orbea, Massi eta kartara egindako bizikletak
Konponketak: bai
Kurtsoak (mekanika....): ez
Irteerak: Club Ciclista de Las Arenas elkartearen sortzaileak.

Dendaren izena: Deportes Soto
Helbidea: Ibaizabal kalea, 2 Algorta (Getxo)
Tailerra: Illeta kalea, 3. Algorta. José Antonio Soto.
Telefonoa: 94-4304750
Webgunea: ez dauka
Ordutegia: astelehenetik ostiralera: 10.30-13.30 eta 17.00-20.00 . Larunbatean: 10.30-14.00
Jabeak: María Teresa Santamaría eta José Antonio Soto.
Jabeei buruzko datuak: getxoztarrak
Denda noiz sortu zen: 1986an (denda) eta orain 32 urte tailerra.
Saltzen diren markak: Conor, AGECE eta kartara egindako bizikletak
Konponketak: bai
Kurtsoak (mekanika....): ez
Irteerak: ez

Bicimanian, bizikletak merke

2006-08-28T23:49:00.000+02:00

Bicimania denda madrildarraren webgunean oso produktu onak dituzte eskaintzan. 18 euroren truk etxeraino eramaten dizuete bizikleta berria, erosteko erabakia hartuz gero. Trek markako bizikleta zoragarriak oso beheraturik daude, ehuneko 20an eta 23an besteak beste. Adibidez, Trek Fuel 80 2006 mendi bizikleta 999 eurotan saltzen dute bertan. Beste bizikleta on bat, Fuel EX 7 2006 Trek markakoa 1599 euroren truk. Zalantzarik gabe, zibergune polita da Bicimania-rena, onlineko denda ere badelako. Ez da txarra, noizean behin gune hau bisitatzea, prezio onak dituzte-eta, bai bizikleta berrietan, bai-eta akzesorioetan mendi bizikleta maite duen ororentzat.

Laugarren irteerako argazkiak

2006-08-27T16:24:00.000+02:00

Laugarren ibilaldian egindako argazkiak dakarzkizuet honetara. Hemen dituzue Agirrebeitiatarrak, Kepa eta Gorka Gallarta-Galdames ibilbide berdea eginez. Guztitara 30 kilometro izan dira: 15 joateko eta 15 itzultzeko. Zorionak Zaloa, Xabier, Nati, Isidoro, Kepa eta Gorkari ibilaldiagatik. Goizeko 10.00etan irten gara Aixerrotako aparkalekutik eta 14.00etan abiatu gara bueltan Gallartako museotik. Penagarria izan da 14.00etan museoa itxita egotea. Hurrengoan izango da, merezi du-eta. Argazkian klik eginez gero, tamaina handian ikus daiteke (640x480 pixel) eta sagua argazki txikiaren gainean ipintzen baduzu, zeri buruz den argazkia ikusten da..

TREK bizikletak probatzeko aukera

2006-08-26T16:20:00.000+02:00

Urtero bezala, abian dago Demo Trek-Subaru-Bike ibilaldia 2006. Gogora dezagun Trek eta Gary Fisher markak probatzeko aukera ematen dutela bizikleta marka kaliforniarrak eta Subaru japoniarrak. Gary Fisher-en bizikletak Trek markaren bidez komertzializatzen direnez, bizikleta ospetsu hauek ere ikus eta proba daitezke Trek-Subaru karabana Euskal Herrira heltzen denean. Zehazki, hauexek dira datak eta tokiak, non mendi bizikleta berriak probatu ahal baitira:

Bilbao ... Ciclos Maestre ... irailaren 30ean
Getxo ... Getxo zikloak ... urriaren 1ean
Gasteiz ... Txirrinduz ... urriaren 14an
Bilbao (Santutxu) ... Ciclos Sandonis ... urriaren 15ean

Demo Trek-Subaru Bike 2006 ibilaldiak Espainiar estutuko 30 herri eta bizikleta-festa bisitatuko ditu eta 27 bizikleta eramango ditu herritarrek probatzeko.
Alboko argazkian, Trek Fuel EX95 suspretsio biko mendi bizikleta karbonozkoa ikus daiteke.

Laugarren irteera Gallarta-Galdames trenbidean zehar

2006-08-16T23:07:00.000+02:00

Abuztuaren 27an, laugarren irteera egingo dugu Getxo aldeko MTBzaleok. Aurrekoak bezalakoa, igandekoa ere ibilaldi erraza izango da teknikoki edozein zaletuk egiteko modukoa. Gallartan bertan aparkatuko ditugu autoak eta Galdames alderaino joango gara Sestao-Galdames trenbide zaharra egiteko. Antzina, meatzariek erabiltzen zuten trenbidea da, gaur egun, bide berdea bihurtuta. Bi tunel pasatzen dira eta bideak ez du aldaparik, ez jaisteko, ez igotzeko. Pentsatu meategietako tren zaharrak ezin zuela aldaparik gainditu. Horregatik esaten dizuet erraza eta erabat laua edo zelaia dela. Kepa Miñambres-ek askotan egin du bidea eta benetan zoragarriak dira bertan ikusiko ditugun paisaiak. Bidea asfaltaturik dago lehen kilometroetan eta gero harritsua da, mendi-bizikletaz ibiltzeko erraza, baina. Guztitara 30 kilometro inguru egingo ditugu, hamabost joateko eta beste horrenbeste itzultzeko. Gainera, bueltan, Gallartako meatzen museoan geldituko gara museo polit hori ikusteko. Txirrindulariok doan daukagu sartzea. Beraz, turismo apur bat ere egingo dugu. Amaitzeko, hona hemen garrantzitsuena:

Irteera-lekua: Aixerrota jatetxearen ondoko aparkalekua
Ordua: goizeko 10.00etan
Eguna: igandean, abuztuaren 27an

Irteeretan eraman beharrekoak

2006-08-10T23:35:00.000+02:00

Bizikletaz ibiltzea, sufrikarioa izan beharrean, zerbait atsegina izan behar da; gure poza eta osasuna handitzeko balio behar duena. Horregatik garrantzitsua da bizikleta egokia eramatea, jantzi erosoak eta abar. Ondoko zerrendan, garrantzitsuak diren gauzen zerrenda daukagu. Gogoratzeko baliagarria izan daitekeelakoan nago:

- Bizikletak aulki erosoa eduki behar du, gure tamainakoa izan behar da eta abiadura asko (27 edo 24) baldin badauka askoz errazago igoko gara aldapetan.
- Jantzi erosoa eraman behar dugu
- Kaskoa derrigorrezkoa da, jakina denez.
- Erlojua eraman ahal da gure batazbesteko abiadura kontrolatzeko, kaloriak eta distantzia
- Betaurrekoak.
- Patrika telefonoa zer gerta ere.
- Erabilera askotarikoa den erreminta bat konponketak egin ahal izateko.

Seguro zuk ere beste batzuk dituzula buruan. Kontua eroso egotea da, ibilaldiaz gozatuz.

Bizikleten tamaina egokiaz

2006-07-29T00:50:00.000+02:00

Mendi bizikletak erosteko momentuan, bizikletaren tamaina zein izan behar den galdetzen diogu geure buruari. Erabaki garrantzitsua izaten da eta bezero asko ideiarik gabe doaz merkataritza zentro handietara kontsulta egin barik edozein bizikleta erosteko, handia zein txikia, tamainan pentsatu gabe. Erreferentzia bezala, hona hemen taula batzuk. Dena dela, pentsa dezagun erreferentziak baino ez direla. Zalantza edukiz gero, hau da, bi tamaina ikusten badugu posibleak direla, onena biak probatzea da, eta ikustea zeinekin gauden erosoago. Lehenbiziko taula honetan gure altuera kontutan hartzen dugu, dagokigun tamaina zein den ikusteko, horrela mendi-bizikleta ganoraz erosi ahal izateko.

Altuera (cm)... mendi-bizikleta (hazbeteak)
160 - 165 .......................... 14
165 - 170 .......................... 16-17
170 - 175 .......................... 18
175 - 180 .......................... 18-19
180 - 185 .......................... 20-21
185 - 190 .......................... 21-22
190 - 200 ............................. 22

Bigarren taula honetan, ostera, gure hankaren goiera hartzen dugu kontutan mendi-bizikleta aukeratzeko momentuan. Horrelakoa gure hanka, halakoa gure bizikleta.

hanka: 71-72 cm.....................................tamaina: 15 hazbete
hanka: 73-74 cm.....................................tamaina: 15,5
hanka: 75-78 cm.....................................tamaina: 16
hanka: 79-82 cm.....................................tamaina: 17
hanka: 83-84 cm.....................................tamaina: 17,5
hanka: 85-88 cm.....................................tamaina: 18
hanka: 89-90 cm.....................................tamaina: 19
hanka: 91-92 cm.....................................tamaina: 19.5
hanka: 93-94 cm.....................................tamaina: 20

Beraz, gogoratu komenigarria dela hanka neurtzea (behetik iztai edo izterrondoraino). Hartu metroa eta neurtu zure hanka bizikleta egoki eta erosoa erosteko. Ez erosi edozein mendi-bizikleta, arren!

La Molinako MTB jaitsiera

2006-07-03T17:35:00.000+02:00

Urtero bezala, uztailaren 8an eta 9an Girona-n, Kataluniako Pirinioetan hain zuzen ere, La Molinako mendi-bizikleta jaitsiera egingo da. Guztitara 1300 metroko desnibela gainditu beharko da 15 kilometrotan zehar. Proba hau Mondraker Freeride Fun Festival-go bigarren jaitsiera da. Guak.com gunean, informazio gehiago aurkitu ahal da. Gogoratu asteburu osoan egon behar dela. Zapatuan entrenamenduak eta proba sailkagarriak egiten dira, igandean distantzia luzeko jaitsiera egiteko. Hirugarren jaitsiera irailaren hasieran izango da Segovian, eta lehenengoa Galiziako Ourensen izan zen ekainaren 3an eta 4an.

Hirugarren irteera, Uribekostan zehar

2006-06-04T18:14:00.000+02:00

Aixerrota sortu zenetik, hirugarren ibilbidea egin dugu Fermin, Ricardo, Gorka eta Jakobek. Gorka Irusta gehitu zaio taldeari, aurreko irteeran hiru baino ez ginelako egon. Kilometroak luze egin dira, oraindik forma hartu behar baitugu Gorka biok. Ricardok eta Ferminek erraz egin dute bidea nekadura handirik gabe... igarri egiten da zein den zaletu porrokatua eta zein zaletu soila. Aixerrota ingurutik irten gara igande goizean eta 15 kilometro ibili eta gero argazki hauek atera ditugu Getxo Zaharreko batzokian, indarrak berriro ere hartzen.

Aixerrota MTB elkarteko kideak

2006-05-11T23:39:00.000+02:00

Hona hemen noiz edo behin Aixerrota elkartearekin ibilbideak egiten ditugun kideok:
Gorka Palazio, Ricardo Sanz, Fermin Soroa, Gorka Irusta, Kepa Miñambres, Isidoro Agirrebeitia, Natividad, Xabier, Zaloa Agirrebeitia, Alfredo Rodriguez Gurtubai, Endika Ena, Iñaki Puerta, Urtzi Altube, Aingeru...
Laster argazki bat agertuko da Aixerrota errotaren ondoan, Getxon bertan egina. Aixerrotatik irteten gara elkartekideok eta izen hori hartu dugu erreferentzia bezala.

Aixerrota elkartea zer den

2006-05-10T23:23:00.000+02:00

Aixerrota MTB elkartea getxoztar bizikletazale batzuek sortutako proiektua da mountain bike (MTB) edo mendi-bizikletaren erabilera sustatzeko beti ere ahal den neurrian euskara praktikatuz. Sortzaileak Sustraiak Kultur Elkartekoak ziren eta mendi-bizikletak batu ditu Aixerrota proiektua gauzatzeko. Euskaraz bizitzeko, osasuntsu eta bidegorrien sarearen alde egiteko, hona hemen 2006. urtean sortu den beste elkarte euskaldun bat Sustraiak kultur elkartearen ekimenez gauzatua. Gure gazteek mendi bizikleta erabil dezaten eta apurka-apurka MTB kirola Uribe Kostan sustatzeko getxoztar batzuek Aixerrota sortzeko beharra ikusi dugu. Euskara eta MTB praktikatu gura badituzu, zatoz gure elkartera eta ibili mendi-bizikletaz geurekin. Laguntasuna emango dizugu MTB kirola praktikatzeko. Ongi etorria izan zaitez!

Beraz, gure helburuak MTB eta euskara dira. Eta honakoak egiteko asmotan gagoz: berbaldiak, bideo eta filmen proiekzioak eta MTB irteerak (ohikoak eta berriak sortuz). Gainera, eta Uribe Kostan dagon bizikleta-denda kopuru altua eta gero eta mendibizikletari gehiago dagoela ikusita, MTBzaleen interesak defendatu nahi ditugu seinalizazio aproposa bultzatuz, bidegorri eta mendiko kaminoetako erabiltzaileek ere zerbitzu onak behar dituztelako. Uribe Kostan BTT zentroa sortzea gure helburuetako bat da.

Zirkuito zoragarria ikusgai

2006-05-03T00:35:00.000+02:00

Google Video guneak pelikulatxo politak ditu MTBari buruz. Begiratu ondoko bideoan zelako zirkuitoa montatu dute Cleveland hirian eta zein trebea den txirrindularia, Ray izenekoa. Laburra da eta Omaha's Freeride Connection izeneko webguneak eskaini du. Sakatu argazkian eta berehala ikusiko duzue zuzenean Google Video-tik. Webgunea bisitatzea ere ez da txarra izango MTB kirola artaziak eta gainerako gauza extremoak egiteko erabiltzen dutenentzat. MTB beste era batez ulertzeko modua baino ez da. Gozatu irudiak.

Aluminiozko BH bizikleta salgai

2006-05-02T01:35:00.000+02:00

Salmenta
Saltzailea: Gorka, gorka.palazio [a bildua] gmail.com
Itema: BH aluminiozkoa, 24 abiadura, galgak Shimano markakoak. Laster argazkia jarriko dut hemen berton.
Prezioa: 70 euro